ᓄᓇᕘᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ (NEU) ᐊᖓᔪᖅᑳᖅ ᔭᐃᓴᓐ ᕉᓵᓐ ᑲᑎᖃᑎᖃᓚᐅᖅᑐᖅ ᒐᕙᒪᑐᖃᒃᑯᓐᓂ ᓯᕗᓕᖅᑎᐊᓂ ᔭᒡᒦᑦ ᓯᖕ ᐊᒻᒪᓗ ᓘᕆ ᐃᓪᓚᐅᑦ ᐃᓱᐊᓂ 2021 ᐅᖃᐅᓯᖃᖅᑐᑎᑦ ᐅᖃᐅᓯᐅᒋᐊᖃᓪᓚᕆᑦᑐᓂᑦ ᐊᑐᖅᑕᐅᓯᒪᕙᓐᓂᖏᓐᓂᑦ ᓄᓇᕗᒻᒥᐅᑦ ᐊᒻᒪᓗ ᐃᖅᑲᐃᑎᔅᓯᓪᓗᑎᑦ ᕿᓐᓂᖅᑕᐃᑦ ᐃᓅᖃᑎᒌᖏᑦ ᐃᓕᓴᕆᔭᐅᓯᒪᓂᐊᖕᓂᖏᓐᓂᑦ ᑕᖅᑭᒋᔭᑦᑎᓐᓂᑦ.
ᐅᓇ ᓯᕗᓪᓕᖅᐹᖅ ‘ᑭᒡᒐᑐᖅᑕᖕᓄᑦ ᓯᕗᓕᖅᑎᒋᔭᐅᓪᓗᖓ’ ᐊᖓᔪᖅᑳᕆᔭᐅᓪᓗᖓ ᐅᖃᐅᓯᒃᓴ ᒫᓐᓇᐅᔪᖅ 2022ᒥ, ᓯᕗᓪᓕᕐᒥᑦ ᖃᓄᐃᖏᑦᓯᐊᖁᓇᐅᕗᓯ ᖃᓄᓕᒫᖅ ᐊᕐᕌᒍᕆᔭᑦᑎᓐᓂᑦ. ᐊᓂᒍᐃᔾᔨᔮᓗᒋᒻᒥᔭᕗᑦ 2021 ᖁᔭᒋᓪᓗᒋᓪᓗ ᐃᓚᒋᔭᐅᔪᓕᒫᑦ ᐱᔪᓐᓇᕐᓂᓕᒫᖕᒥᓂᑦ ᐱᓇᓱᐊᖏᓐᓇᓚᐅᕐᓂᖏᓐᓄᑦ. ᑕᒪᖕᒥᑦ ᐅᐸᒐᐅᓪᓚᕆᑐᑦ ᐊᒻᒪᓗ ᐊᓯᖏᑦ ᑕᑯᑦᓴᐅᖏᓐᓇᖏᒻᒥᔫᒐᓗᐊᑦ ᐱᓕᕆᔨᓪᓚᕆᐅᖃᑕᐅᔪᑦ ᐊᑦᑕᓇᓗᐊᑦᑕᐃᓕᒪᓂᕐᒥᑦ ᐊᒻᒪᓗ ᐱᔨᔅᓯᕋᓂᕐᒥᑦ ᑕᒪᒃᑯᐊ ᐃᓕᒪᓇᖅᑐᑦ ᐊᑐᓕᕋᓗᐊᖅᑎᓪᓗᒋᑦ ᐊᔅᓱᕉᑕᐅᔪᓪᓗ ᓄᕙᔾᔪᐊᓐᓇ 19 ᐱᔾᔪᑎᒋᓪᓗᒍ ᐊᒻᒪᓗ ᓄᓇᕗᒻᒥ ᒐᕙᒪᒃᑯᑦ ᐃᖅᑲᓇᐃᔭᖅᑎᖁᑎᖏᓐᓄᑦ ᐃᓚᒋᔭᐅᔪᓄᑦ ᑲᔪᓯᑎᑕᐅᓚᐅᖅᑐᑦ - ᓄᑖᒥᑦ ᐊᖏᖃᑎᒌᕈᑎᒥᑦ ᐊᑎᓕᐅᓚᐅᖅᓯᒪᓇᓄᑦ.
ᑭᖑᕙᓗᐊᒐᓛᑦᑐᓂ ᐊᕐᕌᒍᒻᒥᑦ ᓄᑖᒥᑦ ᐱᒋᐊᖅᑎᑦᑎᓂᐅᔪᒥᑦ ᐊᑐᒍᒪᓂᐊᖅᑕᑎᓐᓂᑦ, ᑭᓯᐊᓂ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ ᐱᒋᐊᖅᑎᑦᑎᓂᐅᔪᑦ ᐊᑐᒍᒪᔭᑦᑎᓐᓂᑦ ᑐᓴᐅᒪᑎᑦᑎᓂᐅᔪᒥᑦ ᐃᓕᔅᓯᓐᓂᑦ ᐊᖓᔪᖅᑳᖕᓂᑦ ᑐᓴᒐᔅᓴᐅᔪᓂᑦ ᑐᓴᖅᑎᑕᐅᖃᑦᑕᕐᓗᓯ, ᑕᖅᑭᖅ ᑕᒫᑦ “ᑐᓴᒐᔅᓴᓂᑦ ᐊᒻᒪᓗ ᑐᑭᓯᐅᒪᒋᐊᕈᑎᒃᓴᓂᑦ” ᖃᕆᑕᐅᔭᒃᑯᑦ ᑐᕌᕈᑎᖓᓄᑦ ᑎᑎᕋᕝᕕᐅᔪᓐᓇᖅᑐᑦ ᐅᕗᖓ, www.neu.ca ᐊᒻᒪᓗ ᖃᕆᑕᐅᔭᒃᑯᑦ ᐅᖃᖅᑕᐅᓲᖅ facebookᑯᑦ ᓴᖅᑭᔮᖅᑎᑦᑎᒋᓪᓗᑕ ᑕᒪᒃᑯᓇᙵᑦ. ᑲᐅᔨᒪᖁᓪᓗᑎᑦ ᖃᓄᐃᓘᓂᐊᓐᓂᑎᓐᓂᑦ ᓂᕆᐅᕆᔭᖃᕋᑦᑕ ᕕᕝᕗᐊᕆᒥ ᐱᔭᔅᓴᓕᐹᓘᓚᖓᒋᐊᖓᓐᓂᑦ ᐊᒻᒪᓗ ᖁᕕᐊᓇᕈᓘᔭᓂᐊᕐᒥᔪᑦ.
ᓯᕗᓪᓕᒻᒥᑦ, ᑕᖅᑭᕆᔭᑦᑎᓐᓂ ᓇᓪᓕᐅᓂᖅᓯᐅᒍᑕᐅᓂᐊᖅᑐᑦ ᕿᓐᓂᖅᑕᑦ ᐃᓅᖃᑎᒌᑦ ᑭᖑᕚᖏᓪᓗ, ᑐᑭᓯᐅᒪᒋᐊᒃᑲᓐᓂᕈᑎᔅᓯᐊᕙᐹᓗᒃ ᐱᐅᓯᖏᑕ ᒥᔅᓵᓄᑦ ᖃᓄᓪᓗ ᐱᔨᔅᓯᕋᔅᓯᒪᓂᖏᑦ ᑲᓇᑕᒥᐅᓄᑦ. ᐃᖅᑲᓇᐃᔭᖅᑎᓄᑦ ᑲᑐᔾᔨᔩᑦ ᑭᒡᒐᖅᑐᐃᒋᐊᖃᖅᓯᒪᖕᒥᖕᒪᑕ ᐅᕕᓂᖃᑎᒌᖏᓐᓂᐅᑉ ᒥᔅᓵᓄᑦ ᓈᒻᒪᖏᓐᓂᐅᔪᑦ ᓴᖅᑭᑎᓪᓗᒋᑦ ᐃᖅᑲᓇᐃᔭᕐᕕᖕᓂᑦ ᐊᒻᒪᓗ ᐊᕙᓗᓕᒫᑦᑎᓂᓪᓗᑦ. ᑕᒪᓐᓇ ᑐᑭᓯᒋᐊᕈᑎᒋᒃᑲᓐᓂᕈᒪᓐᓂᕈᕕᐅᒃ, ᐅᕗᖓ ᑐᕌᒍᓐᓇᕐᒥᔪᑎᑦ, psaunion.ca.
ᑕᕝᕙᓂ ᑕᖅᑭᕆᔭᑦᑎᓐᓂᑦ ᓄᓇᕘᒥ ᐃᖅᑲᓇᐅᔭᖅᑏᑦ ᑲᑐᔾᔨᖃᑎᒌᖏᑦ, ᑭᒃᑯᑐᐃᓐᓇᓄᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓂᑦ ᑲᓇᑕᒥ (PSAC) ᐅᑭᐅᖅᑕᖅᑐᒥᐅᓄᑦ ᐊᒻᒪᓗ ᐊᓯᖏᑦ ᐃᓚᒋᔭᐅᔪᑦ ᓴᖅᑭᑕᐅᓂᖓᓂᑦ ᐃᓘᓐᓇᑕ ᐱᒋᐊᖅᑎᑕᐅᓂᖓᓐᓂᑦ. ᑕᒪᓐᓇ ᐱᒋᐊᖅᑎᑕᐅᓂᖓ ᓴᖅᑭᑎᔅᓯᔪᒪᓂᑦᑎᓐᓄᑦ ᐊᑦᑐᖅᑕᐅᓯᒪᓪᓚᕆᓐᓂᖏᓐᓄᑦ ᐊᔪᖅᓴᓗᐊᖕᓂᖅ ᐱᓪᓗᒍ ᐊᒻᒪᓗ ᐊᑭᑐᓗᐊᕐᓂᖏᓐᓂᑦ ᓂᖅᑭᓴᑦ ᐱᓪᓗᒋ ᓄᓇᕗᒻᒥ ᐅᑭᐅᖅᑕᖅᑐᒥᓪᓗ. ᐅᓇ ᓴᕿᑎᔅᓯᓂᖅ ᐃᓚᖃᓐᓂᐊᖅᑐᖅ ᐃᓚᒋᔭᐅᔪᑦ ᐱᕕᔅᓴᖃᖅᑎᑕᐅᓗᑎᑦ ᐅᓂᒃᑳᖃᕈᒪᒍᑎᑦ ᐊᔪᖅᓴᓕᖕᓂᐅᑉ ᒥᔅᓵᓄᑦ ᓄᓇᓕᖕᒥᓂᑦ ᐊᒻᒪᓗ ᐊᖏᕐᕋᒥ (ᑕᑯᒋᐊᓪᓗᒍ ᖃᕆᑕᐅᔭᒃᑯᑦ ᓴᖅᑭᔮᖅᑐᑦ ᑎᑎᕋᖅᑕᐅᔪᑦ facebookᑯᑦ ᑐᑭᓯᒋᐊᕈᑎᒋᒃᑲᓐᓂᕈᒪᓐᓂᕈᕕᐅᒃ).
ᐅᓇ ᖁᕕᐊᓇᕈᓘᔭᙵᑦ ᓴᖅᑭᑎᔅᓯᓂᖅ ᐊᑐᓕᖁᔭᑦᑎᓐᓂᑦ ᐱᒋᐊᖅᑎᑕᐅᓪᓗᓂ ᑎᓯᐱᕆᐅᑎᓪᓗᖑ ᐅᖃᐅᓯᐅᓚᐅᖅᑐᖅ ᐃᑲᔪᖅᓱᐃᔪᖅ ᓄᓇᕗᒻᒥᐅᓂᑦ ᑕᐃᔭᐅᔪᖅ Here for Nunavut sᐅᖃᐅᓯᐅᑎᓪᓗᒍ ᐱᕕᔅᓴᖃᖅᑎᔅᓯᓂᖅ ᐃᓕᓐᓂ ᐃᓱᒪᒋᔭᖕᓂᑦ ᑐᓴᖅᑕᐅᖁᔭᑎᑦ ᓂᕈᐊᑕᖕᓄᑦ ᓄᓇᕗᒻᒥ ᒪᓕᒐᓐᓂᐊᖅᑎᒃᑯᑦ ᑎᑎᕋᕐᕕᒋᓗᒋᑦ ᐅᖄᓚᕕᒋᓗᒋᓪᓘᓐᓃᑦ ᓄᓇᕗᒻᒥᑦ ᒐᕙᒪᒃᑯᖏᑦ ᐃᖅᑲᓇᐃᔭᖅᑎᖏᑦ ᐃᓂᓪᓚᓯᒪᑦᓯᐊᕆᐊᖃᖕᓂᖏᓐᓄᑦ ᐃᖅᑲᓇᐃᔮᖕᒥᓂᑦ, ᓈᒻᒪᑦᓯᐊᖅᑑᓗᑎᓪᓗ ᑮᓇᐅᔾᔭᓵᕗᑦ ᐊᒻᒪᓗ ᐅᑭᐅᖅᑕᖅᑐᒥᐅᓄᑦ ᐃᑲᔫᑎᒃᓴᖏᑦ (NNA) ᓇᓕᒧᑦᓯᐊᖁᓪᓗᒋᑦ ᐅᓪᓗᒥᐅᓕᖅᑐᖅ ᐊᑭᖏᓐᓄᑦ.
ᓄᓇᕘᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᐊᐃᕙᐅᑎᖃᑎᖃᖕᒪᑕ ᓄᓇᕗᒻᒥ ᒐᕙᒪᒃᑯᖏᓐᓂᑦ ᐃᓘᓐᓇᑎᓐᓄᑦ. ᓄᓇᕗᒻᒥ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖁᑎᖏᑦ ᐱᔨᔅᓯᕋᖅᑎᓪᓚᕆᕗᑦ ᐊᕐᕌᒍᐃᑦ ᐱᖓᓱᑦ ᓇᑉᐸᓪᓗᐊᖓᓪᓗ ᓄᑖᒥᑦ ᐊᖏᖃᑎᒌᕈᑎᒥᑦ ᐊᑎᓕᐅᓚᐅᖅᓯᒪᓐᓇᑎᑦ. ᓄᓇᕗᒻᒥ ᒐᕙᒪᖓᑦ ᐃᖅᑲᓇᐃᔭᖅᑎᓪᓚᕆᒋᔭᐅᔪ ᓄᓇᕗᒻᒥ ᐊᒻᒪᓗ ᑲᒪᔅᓯᐊᒋᐊᖃᖕᓂᖏᓐᓂᑦ ᐃᖅᑲᓇᐃᔭᖅᑎᖏᓐᓂᑦ ᑕᑯᓐᓈᖅᑎᔅᓯᒋᐊᓕᐅᒐᓗᐊᑦ ᓄᓇᑦᑎᓐᓂᑦ ᑕᐃᒫᑦ. ᑕᐃᒪᐃᖕᒪᑦ ᑕᒪᖕᓇ ᐊᑐᖅᑕᕗᑦ ᐱᒻᒪᕆᐅᕗᖅ ᐃᓘᓐᓇᑎᓐᓄᑦ. ᐱᖓᓲᒻᒪᑕ “ᐱᔭᔅᓴᐅᔪᑦ” ᐊᖏᖃᑎᒌᕈᑎᔅᓴᒥᑦ ᐊᑐᓕᖅᑎᔅᓯᓂᖕᒥᑦ ᓄᓇᕗᒻᒥ ᒐᕙᒪᒃᑯᓐᓂᑦ: ᑮᓇᐅᔾᔭᓵᒋᔭᐅᔪᑦ, ᐅᑭᐅᖅᑕᖅᑐᒥᐅᓄᑦ ᐃᑲᔫᑎᔅᓴᖅ ᐊᒻᒪᓗ ᓂᙵᖅᑕᐅᕙᑦᑐᓄᑦ ᓄᖅᑲᖓᑲᐃᓐᓇᖁᓪᓗᒋᑦ ᐊᑭᓕᖅᓱᖅᑕᐅᓗᑎᑦ ᐱᖁᔨᕗᒍᑦ. ᐅᓇ ᐅᑭᐅᖅᑕᖅᑐᒥᐅᓄᑦ ᐃᑲᔫᓯᐊᒃᓴ ᑐᕌᖓᓂᖅᓴᐅᓪᓗᓂ ᐊᔪᖅᓴᓗᐊᑦᑕᐃᓕᖁᔨᓂᖕᒧᑦ ᐊᒻᒪᓗ ᐱᒋᐊᖃᖕᓂᖏᓐᓄᑦ ᓄᓇᑖᕆᐅᖅᑐᑦ ᓄᓇᕗᒻᒥ ᐱᒍᑎᔅᓴᖃᖁᓪᓗᒋᑦ ᓂᕿᑖᕆᐊᖃᓕᖅᐸᑕ ᓇᓪᓕᐅᒃᑯᒫᖑᔪᑦ.
ᐅᓇ ᐱᔾᔪᑎᓪᓚᕆᐅᖕᓂᖓ ᐊᖏᖃᑎᒌᕈᑎᒥᑦ ᐊᑎᓕᐅᓚᐅᖅᓯᒪᖏᓐᓂᕗᑦ ᓄᓇᕗᒻᒥ ᒐᕙᒪᒃᑯᓪᓗ ᐱᓪᓗᒍ ᓄᓇᕗᒻᒥ ᒐᕙᒪᖓᑦ ᐊᖏᖅᓯᒪᖏᓐᓂᖏᓐᓄᑦ ᐱᔪᒪᓯᒪᓕᕋᓗᐊᖅᑎᓪᓗᑕ ᑲᑎᖃᑎᒌᓪᓗᓄᒃ ᐋᔩᖃᑎᒌᒃᑲᓐᓂᒍᓐᓇᖕᒪᖔᑦᑕ. ᔭᓐᓄᐊᕆᐅᑉ ᓄᙳᐊᓂ ᐅᖃᖅᑕᒃᑲ ᑎᑎᕋᖅᑕᐅᓪᓗᑎᑦ ᓄᓇᕗᑦ ᐱᕙᓪᓕᐊᔪᓕᕆᓕᖏᓐᓄᑦ ᐅᖃᖅᑐᒥᑦ “ᒫᓐᓇᐅᔪᓪᓕ ᓄᓇᕘᒥ ᐃᖅᑲᓇᐃᔭᖅᑏ ᑲᑐᔾᔨᖃᑎᒌᖏᑦ ᐊᑕᐅᓯᖕᒥ ᐅᖃᐅᓯᒃᓴᖃᖅᐳᑦ ᓄᓇᕗᒻᒥ ᒐᕙᒪᒃᑯᖏᓐᓄᑦ: ᐅᓪᓗ ᓇᓗᓇᐃᕐᓗᒍ, ᓇᒥᓗ ᐊᒻᒪᓗ ᖃᓄᐃᓘᒍᒪᓂᕆᔭᔅᓯ ᐱᒋᐊᕈᑎᒋᔪᒪᔭᔅᓯᓪᓗ ᐋᔩᖃᑎᒌᓕᒃᑲᓐᓂᖁᓪᓗᑕ ᑕᐃᑲᓃᒐᔭᖅᑐᒍᑦ ᓯᓚᐃᕐᕆᔭᐃᓂᖕᒨᖓᖏᑦᑐᒧᑦ”.
ᓄᓇᕗᒻᒥ ᒐᕙᒪᒃᑯᖏᑦ ᐱᙱᔾᔪᑎᔅᓴᒥᑦ ᓇᓂᓯᕙᒻᒪᑕ ᐊᒻᒪᓗ ᑕᒪᓐᓇ ᐃᖅᑭᐊᖒᑎᔅᓯᒪᑦᓯᐊᖅᑕᕗᑦ. ᐊᕐᕌᒎᑉ 2021 ᓄᙳᐊᓂ ᐊᖏᖃᑎᒌᕈᑎᒥᑦ ᑲᔪᓯᑎᔅᓯᔪᓐᓇᓚᐅᖅᑐᑕ ᐱᖓᓱᓄᑦ ᐃᖅᑲᓇᐃᔭᕐᕕᓄᑦ ᐊᓯᖏᓐᓄᑦ. ᐱᒋᐊᙵᓐᓂᖓᓂᑦ 2021 ᓄᓇᓕᐸᐅᔭᒃᑯᑦ ᐃᖃᓗᖕᓂ ᓈᒻᒪᒋᔭᑦᑎᓐᓂᑦ ᐊᖏᖃᑎᒌᕈᑎᒥᑦ ᐊᑎᓕᐅᖃᑎᒋᔪᓐᓇᓚᐅᖅᑕᕗᑦ ᐃᓚᖃᖅᑐᑎᑦ ᑕᐃᑲᓂ ᐊᑭᓕᖅᓱᖅᑕᐅᓗᑎᑦ ᓂᙵᖅᑕᐅᕙᑦᑐᑦ ᓄᖅᑲᖓᑲᐃᓐᓇᕈᓐᓇᖅᑎᑕᐅᖁᓪᓗᒋᑦ. ᒫᓐᓇᓗ ᐅᓪᓗᒥ ᐊᖏᖃᑎᖃᖅᓯᒪᓕᖅᑐᒍᑦ ᐆᒪᖁᑎᓕᕆᔨᒃᑯᓐᓂᑦ ᐋᔩᖃᑎᖃᒍᒪᓪᓗᑕ ᐊᒻᒪᓗ ᐃᓱᒪᒋᔭᑦᑎᓐᓂᑦ ᑲᔪᓯᑦᓯᐊᓚᖓᒋᐊᖏᓐᓂᑦ ᐅᑯᐊ ᐃᖅᑲᓇᐃᔭᕐᕕᐅᑉ ᐊᖓᔪᖅᑳᖏᑦ ᐊᒻᒪᓗ ᐋᔩᖃᑎᒌᕈᑎᕗᑦ ᓯᓚᐃᕐᕆᔭᐃᓂᖕᒨᖓᔾᔮᖏᒋᐊᖓ.
ᓇᐅᑕᐃᒪᓕ ᓄᓇᕗᒻᒥ ᒐᕙᒪᒃᑯᖏᑦ ᐊᒻᒪᓗ ᓱᒻᒪ ᓈᒻᒪᒋᔭᖃᑐᐃᓐᓇᖅᑲᑦ ᐃᖅᑲᓇᐃᔭᖅᑎᖁᑎᖏᑦ ᒫᓂᖅᑭᑎᑕᐅᓪᓗᑎᑦ ᑮᓇᐅᔾᔭᓵᖏᑦ ᐅᑭᐅᖅᑕᖅᑐᒥᐅᓪᓗ ᐃᑲᔫᓯᐊᔅᓴᖏᓪᓗ ᐊᕐᕌᒍᐃᑦ ᐱᖓᓱᑦ ᐅᖓᑖᓄᓪᓗ? ᓄᓇᕗᒻᒥ ᒐᕙᒪᖏᑕ ᐃᖅᑲᓇᐃᔭᖅᑎᖏᑦ ᐱᔨᔅᓯᕋᖅᑎᑐᐃᓐᓇᐅᖏᑦᑑᒐᓗᐊᑦ, ᒪᑭᑕᑎᔅᓯᔪᑦ ᐊᐅᓚᓂᖃᑎᔅᓯᓂᖕᒥᓄᑦ. ᖃᓄᒃᑯᐊᖓᐃ ᓄᓇᕗᒻᒥ ᒐᕙᒪᒃᑯᖏᑦ ᐃᓱᒪᔫᒐᓗᐊᑦ?
ᖃᓂᒪᓇᔾᔪᐊᖑᓪᓗᓂ, ᐅᑭᐅᑯᑖᖑᓈᓂ ᐊᒪᓗ ᐃᖅᑲᓇᐃᔮᑦᑕ ᑲᑕᖓᑎᑐᐃᓐᓇᕆᐊᖃᒻᒥᔮᑎᒍᑦ, ᐊᔅᓱᕈᓐᓇᖅᑐᑰᓪᓗᑕᓪᓘᓐᓃᑦ ᐱᓂᖅᓴᐅᒍᓐᓇᕆᓪᓗᓂ. ᑕᐃᒪᐃᖕᒪᑦ, ᐱᒋᐊᖅᑎᑦᑎᓂ ᐊᑐᕈᒪᔭᑦᑎᓐᓂᑦ ᐊᑐᓕᖅᑎᑕᐅᖁᓪᓗᒍ ᑐᓴᐅᒪᑎᔅᓯᓂᖅ ᑐᑭᐅᓯᒪᑎᔅᓯᓂᖅ ᐊᒻᒪᓗ ᖃᐅᔨᒪᑎᔅᓯᓂᖅ ᓇᒻᒥᓂᖅ ᖃᓄᖅ ᖃᐅᔨᒪᒋᐊᑦᓯᐊᖁᓪᓗᒋᑦ ᐃᖅᑲᓇᐃᔭᖅᑎᓪᓗᒋᑦ-ᐃᓅᓯᖏᓪᓗᑦ ᓈᒻᒪᔅᓯᐊᖁᓪᓗᒋᑦ ᐊᒻᒪᓗ ᖃᓄᖅᑑᒍᓐᓇᖁᓪᓗᒋᑦ ᐃᓱᒪᔮᓐᓂᐊᖅᑐᔮᓕᕈᑎᑦ.
ᑕᐃᒫᓪᓗ ᐃᓚᐅᖃᑕᐅᒋᔅᓯ ᖃᕆᑕᐅᔭᒃᑯᑦ ᓴᖅᑭᔮᖅᑎᑕᕗᑦ facebookᒥ ᑐᓴᐅᒪᔭᐅᓲᖅ ᑕᑯᒋᐊᖅᓯᐅᒃ ᐱᕕᔅᓴᖃᖅᑎᑕᐅᓕᖅᑎᓪᓗᒋᑦ ᐃᓚᒋᔭᐅᔪᒪᔪᑦ ᑲᓇᑕᒥ ᐃᓚᐅᖃᑕᐅᓪᓗᑎ ᐅᖃᐅᓯᖃᖅᑎᓪᓗᒋᑦ ᐅᖓᓯᑦᑐᒥᐅᑕᐅᓗᓂ ᐃᖅᑲᓇᐃᔭᖅᑎᐅᔪᑦ ᐊᒻᒪᓗ ᐃᓅᓯᖏᑦ ᖃᓄᖅ ᓈᒻᒪᓂᖃᓲᖑᒻᒪᖔᑕ ᕕᕝᕗᐊᕆ 24ᖑᓕᖅᑲᑦ ᓯᕿᙳᔭᖅ ᓴᐃᐸᒨᖅᑎᓪᓗᒍ ᐄᒦᖔᒐᓱᐊᖕᓂᖓᓂᑦ ᐅᓐᓄᑯᑦ (7pm-8:30pm) ᑲᓇᖕᓇᒥ.
ᑲᔪᖏᖅᓱᐃᕗᖓᓗ ᐃᓕᓐᓂ ᑐᕌᖓᖁᓪᓗᑎᑦ ᓴᖅᑭᔮᖅᑎᑕᐅᔪᒧᑦ ᖃᕆᑕᐅᔭᒃᑯᑦ facebookᑯᑦ ᑕᖅᑭᕆᔭᑦᑎᓐᓂᑦ ᕕᕝᕗᐊᕆᒥ ᖃᓄᖅ ᐃᓚᒋᔭᐅᓕᔪᓐᓇᖕᒪᖔᖅᐱᑦ ᒪᕐᕉᒃ ᓱᓕ ᐃᓕᓴᕆᔭᐅᖁᓪᓗᒋᑦ: ᐊᐅᐸᔮᖓᔪᒥᑦ ᐊᑐᖅᑐᑦ ᐅᕕᓂᕈᒃᓯᒪᓗᑎᑦ ᕕᕝᕗᐊᕆ 23ᖑᓕᖅᑲᑦ (ᓱᒃᑯᓴᑦᑕᐃᓕᒪᓂᖕᒧᑦ ᐅᓪᓗ) ᐊᒻᒪᓗ ᐃᓚᖓᑦ ᐋᓐᓂᐊᖃᓐᓇᖏᑦᑐᓕᕆᓂᖕᒧᑦ ᐊᒻᒪᓗ ᐊᑦᑕᓇᓗᐊᖅᑕᐃᓕᒪᓂᖕᒧᑦ ᓵᓚᑦᓴᒐᓱᖕᓂᖅ (ᓂᕆᐅᒋᓯᐅᒃ) ᐃᓕᓴᖅᓯᑎᔅᓯᖁᔨᓪᓗᑕ ᐃᖅᑲᓇᐃᔭᕐᕕᖕᓂᑦ ᓈᒻᒪᖏᑦᑐᓕᖃᖅᑕᐃᓕᒪᓂᖕᒥᑦ.
ᑲᑐᔾᔨᖃᑎᒌᓪᓗᓄᒃ,
ᔭᐃᓴᓐ ᕉᓈᓐ
ᐊᖓᔪᖅᑳᖓᖅ ᓄᓇᕘᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓄᑦ